Komandanti i KFOR-it, Gjeneral Major Ozkan Ulutas, tha sot në Beograd se misioni është plotësisht i përkushtuar për të zbatuar mandatin e tij afatgjatë bazuar në Rezolutën 1244.
Gjenerali Ulutas theksoi se angazhimi i NATO-s në rajon është i fortë dhe i palëkundur, sepse siguria e Ballkanit Perëndimor është e lidhur pazgjidhshmërisht me sigurinë e Evropës dhe të gjithë zonës euroatlantike.
“KFOR mbetet i përkushtuar për të ofruar siguri, e cila nga ana tjetër ndihmon në krijimin e kushteve të nevojshme për dialog politik. NATO, ndër të tjera përmes aktiviteteve të përditshme të KFOR-it, vazhdon të mbështesë dialogun midis Kosovës dhe Serbisë nën kujdesin e BE-së si një kornizë për zgjidhjen e çështjeve të hapura në dobi të të gjithë njerëzve”, tha Ulutas për mediat serbe.
Ai shtoi se KFOR-i kontribuon në siguri në çdo kohë, në mënyrë të paanshme dhe në koordinim të ngushtë me Policinë e Kosovës dhe Misionin e Sundimit të Ligjit të Bashkimit Evropian (EULEX) në rolet e tyre përkatëse si ofrues të sigurisë.
“Mandati i OKB-së është korniza drejt së cilës ne udhëhiqemi dhe mbi të cilën bazohen të gjitha aktivitetet tona të rregullta. Këto përfshijnë patrullime, angazhim me përfaqësues të të gjitha komuniteteve lokale, mbështetje për programet e rindërtimit, një prani sigurie në manastirin e Deçanit, si dhe mbështetje për iniciativat që ndikojnë drejtpërdrejt në jetën e përditshme të çdo individi në Kosovë, siç është çminimi dhe asgjësimi i sigurt i municioneve shpërthyese”, tha Ulutas.
Ai tha se, si Komandant i KFOR-it, do të bënte gjithçka për të siguruar që misioni të vazhdojë të japë një kontribut të rëndësishëm, jo vetëm për sigurinë e qëndrueshme në të gjithë Kosovën, por edhe për stabilitetin në rajon.
/HisariOnline/
