Gjykata Themelore në Prishtinë ka shpallur aktgjykim dënues ndaj Hysri Selimit, duke e dënuar me gjashtë vjet burgim për veprën penale të spiunazhit.
Aktgjykimi u shpall të hënën nga kryetari i trupit gjykues, Leon Përlaska, së bashku me anëtarët e trupit gjykues, Medie Bytyqi dhe Kushtrim Shyti.
Sipas vendimit të gjykatës, Selimi u dënua me gjashtë vjet burgim, dënim i cili do të ekzekutohet pas plotfuqishmërisë së aktgjykimit. Gjykata gjithashtu e obligoi atë të paguajë 100 euro për paushallin gjyqësor dhe 50 euro për Fondin për Kompensimin e Viktimave të Krimit.
Po ashtu, gjykata vendosi vazhdimin e masës së paraburgimit ndaj Selimit. I akuzuari nuk ishte i pranishëm gjatë shpalljes së aktgjykimit.
Në seancën e shpalljes së vendimit morën pjesë prokurori Bekim Kodraliu dhe mbrojtësi i të dënuarit, avokati Ali Beka.
Selimi ishte deklaruar i pafajshëm në seancën fillestare të mbajtur më 23 shtator 2025.
Sipas aktakuzës së ngritur më 9 shtator 2025 nga Prokuroria Speciale e Republikës së Kosovës, Hysri Selimi akuzohej se nga nëntori i vitit 2009 deri në arrestimin e tij më 6 maj 2025 kishte vepruar si i rekrutuar i Agjencisë së Inteligjencës dhe Sigurisë së Serbisë (BIA), duke mbledhur dhe transmetuar informacione që lidhen me veprimtarinë e ish-pjesëtarëve të UÇK-së, krimet e luftës, personat e radikalizuar dhe pjesëmarrjen e shtetasve shqiptarë në konfliktin në Siri.
HisariOnline – Më afër lajmit, vetëm e vërteta!
