Ambasada e SHBA-së në Prishtinë, në bashkëpunim të ngushtë me Policinë e Kosovës, do të zhvillojë një stërvitje të përbashkët në shkallë të gjerë të premten, më 12 dhjetor, nga ora 15:00 deri në 21:00.
“Ky ushtrim do të përqendrohet në menaxhimin e krizave, koordinimin ndëragjencor dhe procedurat e reagimit ndaj emergjencave. Është pjesë e përpjekjeve të vazhdueshme të Shteteve të Bashkuara dhe Kosovës për të forcuar bashkëpunimin në siguri dhe për të siguruar gatishmërinë në reagimin ndaj një sërë incidentesh të mundshme”, thuhet në njoftimin e ambasadës.
Ambasadat dhe konsullatat e Shteteve të Bashkuara shpesh kryejnë ushtrime me qëllim përgatitjen e punonjësve për emergjenca natyrore ose të shkaktuara nga njeriu. Në përgjithësi, këto arrihen përmes ushtrimeve të brendshme në tavolinë ose në shkallë të vogël. Megjithatë, marrëdhëniet dhe bashkëpunimi i fortë dypalësh midis Shteteve të Bashkuara dhe Qeverisë së Kosovës krijojnë një mundësi unike për të kryer një ushtrim të përbashkët, në shkallë të gjerë, me veprim të drejtpërdrejtë për menaxhimin e krizave në Kosovë.
Gjatë ushtrimit, publiku mund të presë:
– Prani të shtuar të Policisë së Kosovës dhe personelit të sigurisë së Ambasadës së SHBA-së në afërsi të Ambasadës së SHBA-së dhe zonave të tjera të caktuara të trajnimit në Prishtinë; – Ndërprerje të përkohshme të trafikut dhe devijime, duke përfshirë mbyllje afatshkurtra të rrugëve sipas udhëzimeve të Policisë së Kosovës;
– Përdorim i mundshëm i sirenave, altoparlantëve dhe efekteve të tjera stërvitore që mund të jenë të dukshme për banorët dhe kalimtarët.
– Ambasada e SHBA-së thekson se ky është vetëm një ushtrim, jo një përgjigje ndaj një incidenti të vërtetë.
“Ne i kërkojmë publikut mirëkuptimin dhe bashkëpunimin e tyre dhe të ndjekin çdo udhëzim të dhënë nga Policia e Kosovës gjatë kësaj periudhe.
Për informacione shtesë, ju lutemi ndiqni përditësimet nga Ambasada e SHBA-së në Prishtinë në kanalet zyrtare të komunikimit”, thuhet në njoftimin e Ambsadës Amerikane/
/HisariOnline/
