Një alarm për një mjet të dyshuar shpërthyes në Stacionin e Autobusëve në Prishtinë ka rezultuar të jetë i rrejshëm.
Zëdhënësi i Policisë për rajonin e Prishtinës, Enis Pllana, bëri të ditur se rreth orës 08:00 policia ka pranuar një informatë për një mjet të dyshuar shpërthyes në këtë lokacion.
“Menjëherë policia ka ndërmarrë të gjitha masat e sigurisë në atë zonë. Në një perimetër të caktuar janë evakuuar qytetarët, ndërkohë që janë angazhuar njësitet përkatëse për trajtimin e informatës”, tha Pllana.
Ai shtoi se pas kontrolleve të kryera nga njësitet kompetente, nuk është gjetur asgjë e dyshimtë.
“Informata është trajtuar nga ana e policisë. Pas kontrolleve të kryera nga njësitet kompetente, nuk është gjetur asgjë e dyshimtë. Hetuesit policorë, në koordinim me prokurorin e shtetit, kanë filluar punën për zbardhjen e të gjitha rrethanave që ndërlidhen me këtë rast, i cili është cilësuar si lajmërim i rrejshëm”, deklaroi Pllana.
HisariOnline – Më afër lajmit, vetëm e vërteta!
