Çmimet e pronave të banimit në Kosovë kanë vazhduar rritjen edhe në fillim të vitit 2026.
Sipas Indeksit të Çmimeve të Pronave të Banimit (IÇPB) të publikuar nga Agjencia e Statistikave të Kosovës, çmimet në tremujorin e parë (TM1) të vitit 2026 janë rritur për 5.3 për qind krahasuar me të njëjtën periudhë të vitit 2025.
Rritje është shënuar edhe në krahasim me tremujorin e fundit të vitit të kaluar. Sipas të dhënave, çmimet e pronave të banimit janë rritur për 2.4 për qind krahasuar me TM4 2025.
Në rajonin e Prishtinës, rritja ka qenë më e moderuar, me vetëm 1.4 për qind në krahasim me TM1 të vitit 2025.
Ndërkohë, rritja më e theksuar është regjistruar në rajonet e tjera të vendit, ku çmimet e pronave të banimit janë rritur për 12.3 për qind në krahasim me të njëjtën periudhë të vitit të kaluar.
Të dhënat e Agjencisë së Statistikave tregojnë një tendencë të vazhdueshme të shtrenjtimit të tregut të banesave në Kosovë, me dallime të dukshme mes kryeqytetit dhe pjesës tjetër të vendit.
HisariOnline – Më afër lajmit, vetëm e vërteta!
