Kryetari i Lidhjes Demokratike të Kosovës, Lumir Abdixhiku, ka deklaruar se do t’i përgjigjet pozitivisht ftesës për takim nga kryetari i Lëvizjes Vetëvendosje, Albin Kurti, për të diskutuar çështjen e zgjedhjes së presidentit, por vetëm pasi të shpallet vendimi i Gjykata Kushtetuese e Kosovës.
Në një reagim publik, Abdixhiku tha se e ka falënderuar Kurtin për ftesën për takim, duke e njoftuar se do të jetë i gatshëm për dialog në ditën e parë pas verdiktit të Gjykatës Kushtetuese.
Sipas tij, përderisa çështja e zgjedhjes së presidentit ndodhet në shqyrtim në Gjykatën Kushtetuese, është e rëndësishme që spektri politik të tregojë maturi dhe të shmangë proceset paralele politike.
“Kam falënderuar Kryetarin e Lëvizjes Vetëvendosje z. Kurti për ftesën për takim për çështjen e Presidentit.
E kam njoftuar se do t’i përgjigjem pozitivisht kësaj ftese në ditën e parë pas verdiktit të Gjykatës Kushtetuese.
Duke qenë se çështja e zgjedhjes së Presidentit është tashmë në shqyrtim të Gjykatës Kushtetuese, duhet të kuptojmë se koha jonë politike ndalon përkohësisht, ndërsa koha e dëgjimit kushtetues merr fjalën në pavarësinë e saj. Duke respektuar këtë rend, pa procese të tjera politike paralele, i bëjmë nder jo vetëm vetes, por edhe Republikës dhe institucioneve që janë ndërtuar me shumë mund.
Verdikti i Gjykatës duhet pritur me respekt të plotë institucional dhe me qetësi politike. Një orë pas verdiktit, mund të takohemi sërish”, ka shkruar Abdixhiku.
HisariOnline – Më afër lajmit, vetëm e vërteta!
