Agjencia e Statistikave të Kosovës ka publikuar sot statistikat e energjisë për muajin tetor 2025, të cilat tregojnë një rritje të konsiderueshme të konsumit të energjisë elektrike.
Të dhënat më të fundit të publikuara nga Agjencia e Statistikave të Kosovës tregojnë se kërkesa për energji elektrike ka shënuar rritje të ndjeshme gjatë tetorit, duke ushtruar presion shtesë mbi sistemin energjetik të vendit.
Gjatë tetorit, konsumi total i energjisë elektrike ka arritur në 458.17 GWh, që përfaqëson një rritje prej gati 17 për qind krahasuar me tetorin e vitit të kaluar. Amvisëritë mbeten konsumatori kryesor, me mbi gjysmën e energjisë së shpenzuar, përkatësisht 58.4 për qind, ndërsa sektori komercial dhe industria pasojnë me 25.7 për qind dhe 11.0 për qind.
Në të njëjtën kohë, prodhimi vendor i thëngjillit ka shënuar rënie. Sipas statistikave, në tetor janë prodhuar 616.33 mijë ton thëngjill, rreth 14.8 për qind më pak se në të njëjtin muaj të vitit 2024, duke ndikuar drejtpërdrejt në kapacitetet prodhuese të energjisë.
Si pasojë e rritjes së konsumit dhe rënies së prodhimit, Kosova është detyruar të rrisë importin e energjisë elektrike për të përmbushur nevojat e tregut, duke theksuar edhe një herë sfidat strukturore të sektorit energjetik në vend.
/HisariOnline/
