Sot, në ambientet e Kuvendit të Kosovës, janë zhvilluar homazhe në nderim të ish-kryetarit të Kuvendit, Nexhat Daci, i cili ndërroi jetë në moshën 81-vjeçare.
Kryeministri në detyrë, Albin Kurti, së bashku me ministrat në detyrë Artane Rizvanolli dhe Rozeta Hajdari, vizituan arkivolin e ish-kryeparlamentarit dhe shprehën ngushëllimet për familjen, miqtë dhe bashkëpunëtorët e Dacit.
Përveç Kurtit, homazhe i bënë edhe kryetari i Partisë Demokratike të Kosovës, Bedri Hamza, së bashku me bashkëpartiakët Vlora Çitaku, Blerta Deliu-Kodra dhe Elmi Reçica, si dhe presidentja e vendit, Vjosa Osmani, dhe kryeparlamentari në detyrë Dimal Basha.
Anëtarë të Lidhjes Demokratike të Kosovës, të udhëhequr nga nënkryetari Lutfi Haziri, gjithashtu nderuan Dacin.
Homazhet u zhvilluan pranë arkivolit në ambientet e Kuvendit, ku morën pjesë edhe personalitete nga jeta politike dhe akademike, si dhe qytetarë të shumtë që donin t’i jepnin lamtumirën e fundit ish-kryeparlamentarit.
Sipas agjendës zyrtare, nga ora 12:00 deri në 12:45 do të mbahet Akademia Përkujtimore në Sallën Plenare të Kuvendit të Kosovës.
Ndërkaq, ceremonia e varrimit me nderime shtetërore do të mbahet nga ora 13:40 deri në 14:20, në Varrezat në Dragodan.
Familjarët kanë njoftuar se e pamja do të mbahet nga data 3 deri më 5 janar.
/HisariOnline/
