Qeveria e Kosovës ka marrë vendim që të shpallë organizatë terroriste Korpusin e Gardës Revolucionare Islamike të Iranit (IRGC).
Ky vendim u bë i ditur nga kryeministri i Kosovës, Albin Kurti, i cili theksoi se ky hap e forcon pozicionin e Kosovës në mbrojtjen e sigurisë ndërkombëtare dhe vlerave demokratike.
Sipas Kurtit, vendimi për shpalljen e IRGC-së si organizatë terroriste përfaqëson një rreshtim të qartë të Kosovës përkrah aleatëve strategjikë në luftën kundër terrorizmit.
Ai e përshkroi këtë strukturë si një organizatë që, sipas tij, përdor dhunën e organizuar dhe terrorizmin si instrument të politikës së jashtme, duke kontribuar në destabilizimin rajonal dhe global.
“Ky propozim-vendim paraqet bazën ligjore dhe strategjike për shpalljen e Trupave të Gardës Revolucionare Islamike si organizatë terroriste në Republikën e Kosovës. IRGC është identifikuar si një strukturë që përdor terrorizmin dhe dhunën e organizuar si instrument të politikës së jashtme, duke kontribuar në destabilizimin rajonal dhe global. Përmes këtij vendimi, Kosova forcon qëndrimin e saj në mbrojtje të sigurisë ndërkombëtare, vlerave demokratike dhe të drejtave të njeriut”, ka thënë Kurti.
Korpusi i Gardës Revolucionare Islamike (IRGC) është krahu ideologjik i ushtrisë së Iran dhe është krijuar pas revolucionit të vitit 1979 me qëllim mbrojtjen e sistemit klerikal në vend.
IRGC tashmë është shpallur organizatë terroriste nga disa shtete, përfshirë Shtetet e Bashkuara të Amerikës, ndërsa së fundmi edhe Bashkimi Evropian ka ndërmarrë masa të ngjashme pas shtypjes së protestave antiqeveritare në Iran.
Sipas organizatave për të drejtat e njeriut, gjatë protestave në Iran janë vrarë mbi 6,000 persona, ndërsa forcat e sigurisë, përfshirë Gardën Revolucionare, janë akuzuar për përdorim të dhunës së drejtpërdrejtë ndaj protestuesve.
Irani nuk e njeh Kosovën si shtet dhe nuk ka marrëdhënie diplomatike me të.
HisariOnline – Më afër lajmit, vetëm e vërteta!
