Politikani kosovar i lindur në Suharekë, Arbër Bullakaj, nga 27 prilli do të jetë deputet në Parlamentin e Zvicrës.
Në zgjedhjet e fundit parlamentare, të mbajtura në vitin 2023 ai ishte radhitur në vendin e parë në listën e pritjes, që i mundësonte zgjedhjen në rast të tërheqjes së ndonjë deputeti të zgjedhur, ndërsa tani ai ka gjetur zyrtarisht një vend në Parlament, pas tërheqjes së deputetes Claudia Friedl.
Bullakaj, pas Islam Alijajt, është shqiptari i dytë që fiton një vend në organin më të lartë legjislativ të Zvicrës dhe të dy vijnë nga Prtia Socialdemokrate (SP).
Bullakaj ka jetuar deri në moshën 8 vjeçare në vendlindjen e tij në Suharekë, i lindur në Sallagrazhdë. Dy ditë pasi Arbri i kishte mbushur 8 vjet, së bashku me nënën, dy vëllezërit dhe motrën e tij kishin marrë rrugën e migrimit drejt Zvicrës, ndërsa atje më pas u formësua dhe u angazhua në skenën politike.
Për këtë arritje kaq të madhe ka shkruar vet Bullakajt, ku ka bërë publik lajmin për vendin e tij si deputet.
“33 vjet në politikën parlamentare – në këshillin bashkiak, parlamentin kantonal dhe që nga viti 2013 në Këshillin (Parlamentin) Kombëtar. Një jetë plot arritje politike që e respektoj thellësisht. Faleminderit, Claudia! Unë do ta zë vendin e saj më 27 prill.
Duhet të ndalem për një moment.
Viti 2015. Po kandidoja për Këshillin Kombëtar për herë të parë. Numri 9 në listën e 12 kandidatëve. Njeri pothuaj i panjohur. Pa buxhet të madh. Pa mbiemër me traditë politike në politikën zvicerane. Dhe pastaj ndodh diçka e papritur.
Qindra njerëz – shumë prej tyre pa asnjë përvojë të mëparshme politike – ngrenë vullnetarisht postera në muret e shtëpive të tyre. Ata organizohen vetë. Ata i bindin fqinjët e tyre. Jo sepse i dërgon ndonjë parti. Por sepse nuk e shohin veten në Këshillin Kombëtar. Dhe sepse duan ta ndryshojnë këtë. Kjo nuk është një fushatë. Kjo është një lëvizje. Ajo që vijon është një udhëtim, i nxitur nga energjia që lind kur shumë njerëz bashkohen për të arritur diçka më të madhe se ajo që aktualisht duket e mundur.
Tri fushata zgjedhore. Në vitin 2015, një rezultat i jashtëzakonshëm – pavarësisht se isha i nënti në listë. Në vitin 2019, kandidati më i mirë i ri dhe alternativi i parë. E njëjta gjë edhe në vitin 2023.
Janë njëmbëdhjetë vjet që më kanë treguar se politika nuk është një sprint, por një dhjetëgarësh. Vetëm qëndrueshmëria nuk është e mjaftueshme. Duhet të mendoni strategjikisht, këmbëngulja, aftësia për t’i bërë ballë presionit – dhe nevojitet aftësia për t’u ngritur përsëri e përsëri.
Shoqata “Aktion Vierviertel” lindi nga kjo energji. Dhe iniciativa e demokracisë lindi nga kjo punë, me bindjen e thellë se katër të katërtat e përbëjnë Zvicrën – dhe jo vetëm tri, kur një e katërta e popullsisë është e përjashtuar nga pjesëmarrja. Në këtë rrugë nuk kam qenë kurrë i vetmuar…. Pastaj Bullakaj falënderon të gjithë ata që e kanë ndihmuar për arritjen e tij më të madhe politike.
Në vazhdim ai shprehet se në Këshillin Kombëtar, do të avokojë për të drejta të drejta qytetarie pa arbitraritet për të gjithë ata që e quajnë këtë vend shtëpi të tyren. Për një Zvicër që i formëson marrëdhëniet e saj me Evropën dhe botën në mënyrë të besueshme dhe me bindje. Për një shoqëri që jeton kundër diskriminimit jo si slogan, por si një parim thelbësor.
Për një Zvicër ku nuk ka rëndësi nga vjen, në çfarë beson apo kë do”, ka shkruar ai.
HisariOnline – Më afër lajmit, vetëm e vërteta!
