Procesi i gjatë gjyqësor ndaj ish-presidentit të Kosovës, Hashim Thaçi, ka hyrë në një fazë vendimtare pas mbylljes së deklarimeve përfundimtare, teksa mbrojtja shprehet optimiste për epilogun.
Avokati mbrojtës i Thaçit, Lluka Mishetiq, është deklaruar pas përfundimit të kësaj faze, duke e cilësuar procesin si një betejë të gjatë në sallën e gjyqit dhe duke thënë se ka arsye për optimizëm.
Mishetiq për media ka thënë se, nga ajo çfarë është dëgjuar gjatë ditëve të fundit, mbrojtja beson se ka të drejtë si në prova ashtu edhe në ligj.
“Me procese të gjata gjyqësore për një betejë në sallën e gjyqit, përshtypja jonë në fund është se kemi çdo arsye të jemi optimistë për një rezultat shumë pozitiv. Është gjithmonë e paarsyeshme të përpiqesh të parashikosh diçka në një çështje gjyqësore, sepse në fund gjithçka varet nga gjyqtarët. Por nga argumentet që kemi dëgjuar sot dhe gjatë 10 ditëve të fundit, si dhe nga mbrojtja e prokurorisë, ne besojmë se kemi të drejtë si në prova ashtu edhe në ligj. Dhe siç thashë, presim rezultate shumë të mira”, ka deklaruar ai.
Tutje, Mishetiq ka folur edhe për kontekstin ndërkombëtar të periudhës së luftës, duke theksuar rëndësinë që kishte Kosova në politikën e jashtme në vitet 1998 dhe 1999.
“Nuk kam folur me të gjitha ato institucione. Kemi folur me disa prej tyre. Nuk do t’i përmend me emër, sepse nuk më kanë dhënë leje t’i përmend. Por sigurisht, ata u befasuan nga argumentet dhe veçanërisht menduan se kishte mungesë kuptimi për procesin me të cilin diplomatët dhe zyrtarët e tjerë ushtarakë sigurojnë informacion, veçanërisht kur drejtojnë një luftë në terren. Siç e dini të gjithë, Kosova ishte çështja më e rëndësishme e politikës së jashtme në vitin 1999 dhe madje edhe në vitin 1998. Kishte shumë informacion që po mblidhej nga agjencitë diplomatike dhe të inteligjencës, si dhe nga të tjerë, përfshirë mediat në atë kohë. Pra, nuk kishte mungesë informacion”, ka deklaruar ai.
HisariOnline – Më afër lajmit, vetëm e vërteta!
