Kryeprokurori i Prokurorisë Themelore në Prizren, Petrit Kryeziu, ka pritur në takim Koordinatoren Nacionale për Zgjedhje, Laura Pula, dhe Menaxherin e projektit strategjik “Mbrojtja e votës”, zt. Besim Kusari.
Gjatë takimit, u diskutua për zhvillimin e hetimeve paraprake lidhur me mospërputhjet e votave gjatë numërimit brenda subjekteve politike për deputet në komunën e Prizrenit.
“Kryeprokurori njoftoi se, pas përfundimit të procesit të rinumërimit të votave, po vazhdon grumbullimi i informatave dhe provave të nevojshme për të vërtetuar nëse është kryer ndonjë vepër penale lidhur me procesin zgjedhor”, thuhet në njoftim.
Takimi gjithashtu përfshiu diskutime mbi angazhimin e Prokurorisë së Shtetit për mbrojtjen e votës së lirë të qytetarëve dhe për vazhdimin e hetimeve në drejtim të sigurimit të dëshmive dhe provave relevante.
/HisariOnline/
